CCLXXVIII.

1386, Februar 22. o. O.

Der Abt Peter und der Convent verkaufen das ihnen zu Althof-Dürr bei Breslau gehörige Allod an Jakob Lybingi von Neisse, Bürger zu Breslau.

In nomine domini amen. Nos frater Petrus divina et apostolice sedis providencia abbas monasterii Camencz ordinis Cisterciensis Wratislaviensis dyocesis districtusque Frankensteinensis, una cum fratribus nostris senioribus, videlicet: Nicolao de Paczkow priore, Vincentio de Swidnicz suppriore, Andrea de Hermansdorff cellerario, Johanne preposito in Wartha, Johanne borsario ceterisque nostris fratribus ac toto conventu monasterii Camencz predicti recognoscimus universis et singulis presencium noticiam habituris, quod tractatu sollempni et deliberacione prehabita diligenti de et cum consilio concordi et consensu unanimi fratrum omnium predictorum, non coacti, nec compulsi nec decepti, sed ex certa nostra sciencia, allodium nostrum Aldinhoff nuncupatum situm in districtu Wratislaviensi, novem mansos minus uno quartali agrorum continens, cum omnibus et singulis eiusdem allodii appendiis, fructibus et pertinenciis, usibus et utilitatibus, agris cultis et incultis et ceteris obvencionibus, nullis penitus exclusis, expressis vel non expressis, prout dictum allodium in suis greniciis et metis circumferencialiter est distinctum necnon omni eo iure et dominio ac proprietatis tytulo, prout honorabilis et discretus vir Johannes Sechsbecher seu alii antecessores, cives Wratislavienses, pro se, suis heredibus et legitimis successoribus habuerunt, tenuerunt et possederunt, pro quadam pecunie summa nobis ad plenum persoluta rite et racionabiliter, empcionis et vendicionis forma servata, vendidimus, tradidimus et voluntarie resignavimus honesto viro Jacobo Lybingi de Nysa civi Wratislaviensi et successoribus suis legitimis ad habendum, tenendum, usufruendum, vendendum, donandum, alienandum necnon iure perpetuo pacifice possidendum liberumque ab omni servicio, nisi, quod nobis singulis annis et perpetuis temporibus super festum beati Michaelis archangeli dictus Jacobus Lybingi suique successores et heredes ipsius legitimi racione census hereditarii septem fertones grossorum Pragensium Polonicalis numeri sine quavis retardacione nobis et nostris successoribus de allodio eodem solvere teneantur. Nos igitur frater Petrus abbas in Camencz una cum omnibus et singulis fratribus prescriptis renuncciamus ex nunc omni accioni, arrestacioni et omnibus aliis, que nobis in dicto allodio nunc vel in futuro competere possent, necnon rectoribus nostri ordinis institutis de iure vel de gracia qualicunque modo suffragantibus, quibus presens contractus, empcio vel solucio in toto vel in parte annullari, impugnari posset vel infringi, dictumque allodium cum suis appendiis, pertinenciis et iuribus, prout superius exprimitur, prefato Jacobo Lybingi, heredibus et legitimis suis successoribus contulimus per presentes, necnon huius scripti patrocinio perpetuis temporibus conferimus. Insuper adiicimus, quod considerantes et animadvertentes fidelia servicia, que Jacobus nobis et nostro monasterio exhibuit et fructuosius exhibere poterit in futurum, sibique et suis heredibus ac legitimis successoribus ex gracia speciali concedimus et donamus, quod dictum allodium cum suis adherenciis exponere, locare seu eciam pro censu annuo ex hereditate poterint, quandocunque sue placuerit voluntati, salvo tamen nostro dominio et hereditario censu septem fertonum predictorum, que nobis et conventui nostro in dictis bonis specialiter reservamus. Harum quibus sigillum nostrum una cum sigillo conventus nostri sunt appensa. Actum et datum anno domini millesimo trecentesimo octuagesimo sexto in die kathedre beati Petri apostoli in domo Rychardi, civis Wratislaviensis; presentibus testibus, videIicet: fratre Johanne preposito in Wartha, Rychardo, Jacobo Swarcze, Nicolao Rudisch civibus Wratislaviensibus; Franczcone Lybingi, fratre Johanne Gabil converso et advocato nostro (in) Camencz, cum aliis pluribus viris fide dignis.

Or. Perg. im Domarchive zu Breslau (B. 69). Von den Siegeln sind nur noch einzelne Bruchstücke vorhanden. Gedr. bei Heyne, Dokum. Bisthumsgesch. Bd. II. S. 797. Vgl. Soffner, Gesch. von Oltaschin S. 82.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.